হাইজেকৰ খবৰক লৈ আতংক, ফ্ৰেংকফুৰ্টৰ পৰা দিল্লী অভিমুখী AI2030 বিমানত নিৰাপত্তাজনিত সতৰ্কবাণী
ডিজিটেল ডেস্ক: জাৰ্মানীৰ ফ্ৰেংকফুৰ্টৰ পৰা দিল্লী অভিমুখে আহি থকা এয়াৰ ইণ্ডিয়াৰ এখন বিমানৰ জয়পুৰ আন্তঃৰাষ্ট্ৰীয় বিমানবন্দৰত জৰুৰী অৱতৰণ কৰোৱা হয়। বিমানখন হাইজেক কৰা হোৱাৰ খবৰ লাভ কৰাৰ পিছতে নিৰাপত্তাৰ স্বাৰ্থত এই ব্যৱস্থা গ্ৰহণ কৰা হৈছিল। অৱশ্যে, নিৰাপত্তা সংস্থাৰ প্ৰাথমিক তদন্তত হাইজেকৰ খবৰ উৰাবাতৰি বুলি প্ৰকাশ পোৱা বুলি প্ৰতিবেদনত উল্লেখ কৰা হৈছে।
প্ৰাপ্ত তথ্য অনুসৰি, এয়াৰ ইণ্ডিয়াৰ AI2030 বিমানখনৰ সন্দৰ্ভত বুধবাৰে পুৱা ৯.০৫ বজাত আহমেদাবাদ আৰু এয়াৰ ট্ৰেফিক কণ্ট্ৰ’ল (ATC)-লৈ জৰুৰী সতৰ্কবাণী আহিছিল। ইয়াৰ পিছতে বিমানখনৰ পথ সলনি কৰি জয়পুৰত অৱতৰণ কৰোৱা হয়। বিমানখনে আগদিনা নিশা ১০.৪৫ বজাত যাত্ৰা আৰম্ভ কৰিছিল।
বিমানবন্দৰত নিৰাপত্তা ব্যৱস্থা কটকটীয়া
জৰুৰী অৱতৰণৰ পিছতে জয়পুৰ বিমানবন্দৰত নিৰাপত্তা ব্যৱস্থা কটকটীয়া কৰা হয়। বোমা নিষ্ক্ৰিয়কৰণ দল, অগ্নিনিৰ্বাপক বাহিনী আৰু আৰক্ষীৰ কেইবাটাও দল বিমানবন্দৰত উপস্থিত হয়। ৰাজস্থান আৰক্ষীৰ অতিৰিক্ত সঞ্চালক প্ৰধানসহ কেইবাগৰাকীও উচ্চপদস্থ বিষয়াই পৰিস্থিতিৰ বুজ লয়।
প্ৰাথমিক তথ্যৰ উদ্ধৃতি দি এক সূত্ৰই জনোৱা অনুসৰি, বিমানখন মুম্বাই ফ্লাইট ইনফৰ্মেচন ৰিজন (FIR)ৰ আকাশমাৰ্গত থকাৰ সময়ত পাইলটে ‘স্কোৱাক ৭৫০০’ সংকেত প্ৰেৰণ কৰিছিল। বিমানত বেআইনী হস্তক্ষেপ বা হাইজেকৰ আশংকা সূচাবলৈ এই সংকেত ব্যৱহাৰ কৰা হয়।
নিৰাপত্তা পৰীক্ষাৰ বাবে পৃথক স্থানত বিমান
বয়িং ৭৮৭-৯ শ্ৰেণীৰ বিমানখন জয়পুৰত অৱতৰণ কৰাৰ পিছত নিৰাপত্তা পৰীক্ষাৰ বাবে পৃথক স্থানত ৰখা হয়। জয়পুৰ আৰক্ষীৰ এগৰাকী বিষয়াই সংবাদ সংস্থা পিটিআইক জনোৱা অনুসৰি, বোমাৰ ভাবুকিৰ তথ্য লাভ কৰাৰ পিছতে বিমানবন্দৰ কৰ্তৃপক্ষই আৰক্ষীক অৱগত কৰিছিল।
বিমানখনত কিমানগৰাকী যাত্ৰী আছিল, সেই বিষয়ে তাৎক্ষণিকভাৱে নিশ্চিত তথ্য প্ৰকাশ পোৱা নাছিল। ঘটনাটোক লৈ এয়াৰ ইণ্ডিয়াৰ আনুষ্ঠানিক বিবৃতিৰ অপেক্ষা কৰা হৈছে।
