জিলা পৰ্যায়: ২৭ অক্টোবৰ–৫ নৱেম্বৰ, ক্লাষ্টাৰ পৰ্যায়: ১১–১৫ নৱেম্বৰ, চূড়ান্ত পৰ্যায়: ২০–২৯ নৱেম্বৰ
অসমৰ ২৮খন জিলাত এই প্ৰতিযোগিতাৰ খেলসমূহ অনুষ্ঠিত হ’ব
গুৱাহাটী, ১৩ অক্টোবৰ : গুৱাহাটী ক্ৰীড়া সন্থাৰ (GSA) উদ্যোগত আৰু অসমৰ জিলা ক্ৰীড়া সন্থাসমূহৰ সহযোগত অনুষ্ঠিত হ’বলগীয়া ৭১সংখ্যক লোকপ্ৰিয় বৰদলৈ ট্ৰফী ফুটবল প্ৰতিযোগিতা, ২০২৬ অহা ২৭ অক্টোবৰৰ পৰা আৰম্ভ হ’ব। অসমৰ ২৮খন জিলাত এই প্ৰতিযোগিতাৰ খেলসমূহ অনুষ্ঠিত হ’ব।
দেশৰ অন্যতম সন্মানীয় ফুটবল প্ৰতিযোগিতা হিচাপে পৰিচিত লোকপ্ৰিয় বৰদলৈ ট্ৰফী এইবাৰ তিনিটা পৰ্যায়ত অনুষ্ঠিত হ’ব—জিলা পৰ্যায়, ক্লাষ্টাৰ পৰ্যায় আৰু চূড়ান্ত পৰ্যায়। এই প্ৰতিযোগিতাই অসমৰ বিভিন্ন প্ৰান্তৰ ফুটবল খেলুৱৈসকলক নিজৰ প্ৰতিভা প্ৰদৰ্শন আৰু সন্মানীয় ট্ৰফীখনৰ বাবে প্ৰতিদ্বন্দ্বিতা কৰাৰ সুযোগ প্ৰদান কৰিব।
এইবাৰৰ প্ৰতিযোগিতাত প্ৰায় ২৮০টা ক্লাব আৰু ৮,৪০০গৰাকী খেলুৱৈয়ে অংশগ্ৰহণ কৰাৰ সম্ভাৱনা আছে। তিনিওটা পৰ্যায়তে মুঠ ৬০৫খন খেল অনুষ্ঠিত হ’ব।
জিলা পৰ্যায়: ২৭ অক্টোবৰ–৫ নৱেম্বৰ, ২০২৬
প্ৰতিযোগিতাৰ প্ৰথম পৰ্যায়ৰ খেলসমূহ ২৭ অক্টোবৰৰ পৰা ৫ নৱেম্বৰলৈ অসমৰ ২৮খন জিলাত অনুষ্ঠিত হ’ব। প্ৰতিখন জিলাত আঠটা দলক দুটা গোটত বিভক্ত কৰা হ’ব আৰু প্ৰতিখন জিলাত ১৫খনকৈ খেল অনুষ্ঠিত হ’ব। প্ৰতিখন জিলাৰ বিজয়ী দলে ৭৫,০০০ টকাৰ পুৰস্কাৰ লাভ কৰিব।
ক্লাষ্টাৰ পৰ্যায়: ১১–১৫ নৱেম্বৰ, ২০২৬
প্ৰতিযোগিতাৰ দ্বিতীয় পৰ্যায়ৰ খেলসমূহ ১১ৰ পৰা ১৫ নৱেম্বৰলৈ অসমৰ ছটা ক্লাষ্টাৰত অনুষ্ঠিত হ’ব। প্ৰতিটো ক্লাষ্টাৰত ছটাকৈ দলে অংশগ্ৰহণ কৰিব আৰু প্ৰতিটো ক্লাষ্টাৰত পাঁচখনকৈ খেল অনুষ্ঠিত হ’ব।
ছটা ক্লাষ্টাৰ আৰু ইয়াৰ অন্তৰ্গত জিলাসমূহ হ’ল—
ক্লাষ্টাৰ ১—উজনি অসম: তিনিচুকীয়া, ডিব্ৰুগড়, শিৱসাগৰ, চৰাইদেউ, যোৰহাট আৰু মাজুলী।
ক্লাষ্টাৰ ২—উত্তৰ অসম: শোণিতপুৰ, বিশ্বনাথ, লখিমপুৰ, ধেমাজি, ওদালগুৰি আৰু দৰং।
ক্লাষ্টাৰ ৩—মধ্য অসম: মৰিগাঁও, নগাঁও, হোজাই, গোলাঘাট আৰু পশ্চিম কাৰ্বি আংলং।
ক্লাষ্টাৰ ৪—নামনি অসম: কোকৰাঝাৰ, বাক্সা, দক্ষিণ শালমাৰা-মানকাচৰ, বঙাইগাঁও, ধুবুৰী, চিৰাং আৰু বৰপেটা।
ক্লাষ্টাৰ ৫—বৰাক উপত্যকা: হাইলাকান্দি, শ্ৰীভূমি, কাছাৰ, ডিমা হাছাও আৰু কাৰ্বি আংলং।
ক্লাষ্টাৰ ৬—ৰাজধানী অঞ্চল: কামৰূপ (মহানগৰ), কামৰূপ, গোৱালপাৰা, তামুলপুৰ, বজালী আৰু নলবাৰী।
প্ৰতিটো ক্লাষ্টাৰৰ চেম্পিয়ন দলে ১ লাখ টকা আৰু ৰানাৰ্ছ-আপ দলে ৭৫ হাজাৰ টকাৰ পুৰস্কাৰ লাভ কৰিব।
চূড়ান্ত পৰ্যায়: ২০–২৯ নৱেম্বৰ, ২০২৬
প্ৰতিযোগিতাৰ চূড়ান্ত পৰ্যায়ৰ খেলসমূহ ২০ নৱেম্বৰৰ পৰা গুৱাহাটীৰ জজেছ ফিল্ডত আৰম্ভ হৈ ২৯ নৱেম্বৰলৈ চলিব।
এই পৰ্যায়ত জিলা পৰ্যায়ৰ পৰা যোগ্যতা অৰ্জন কৰা ১২টা দল আৰু আমন্ত্ৰিত চাৰিটা দলকে ধৰি মুঠ ১৬টা দলে চেম্পিয়ন খিতাপৰ বাবে প্ৰতিদ্বন্দ্বিতা কৰিব।
চূড়ান্ত পৰ্যায়ৰ পুৰস্কাৰৰ ধন এনেধৰণৰ—
- চেম্পিয়ন: ১০ লাখ টকা
- ৰানাৰ্ছ-আপ: ৫ লাখ টকা
- ছেমি-ফাইনেলিষ্ট: প্ৰতিটো দললৈ ২.৫০ লাখ টকা
জিলা পৰ্যায়ৰ বিস্তৃত প্ৰতিযোগিতা, ছটা ক্লাষ্টাৰ কেন্দ্ৰ আৰু গুৱাহাটীত দহদিনীয়া চূড়ান্ত পৰ্যায়ৰ খেলৰ জৰিয়তে ৭১সংখ্যক লোকপ্ৰিয় বৰদলৈ ট্ৰফীয়ে অসমৰ বিভিন্ন প্ৰান্তৰ ক্লাব, খেলুৱৈ, বিষয়া আৰু ফুটবলপ্ৰেমীক একত্ৰিত কৰিব বুলি আশা কৰা হৈছে।
