UPI পেমেণ্টত গ্ৰাহকে দিব নালাগে চাৰ্জ, ব্যৱসায়ীৰ বাবে প্ৰস্তাৱিত MDR স্থগিত

২,০০০ টকাৰ ওপৰৰ নিৰ্বাচিত মাৰ্চেণ্ট লেনদেনত MDR আৰোপৰ সিদ্ধান্ত স্থগিত NPCIৰ

ডিজিটেল ডেস্ক : UPI পেমেণ্টৰ নিৰ্বাচিত মাৰ্চেণ্ট লেনদেনত মাৰ্চেণ্ট ডিছকাউণ্ট ৰেট (MDR) আৰোপৰ সিদ্ধান্ত দীপাৱলীৰ পিছলৈ পিছুৱাই দিয়া হৈছে। ১৫ অক্টোবৰ, ২০২৬ৰ পৰা এই ব্যৱস্থা কাৰ্যকৰী হোৱাৰ কথা আছিল। উৎসৱৰ বতৰত ব্যৱসায়ীসকলক সকাহ দিয়াৰ উদ্দেশ্যে সিদ্ধান্তটো স্থগিত ৰখা হৈছে বুলি প্ৰকাশিত প্ৰতিবেদনত উল্লেখ কৰা হৈছে।

নেচনেল পেমেণ্টছ কৰ্প’ৰেচন অৱ ইণ্ডিয়া (NPCI)-এ ১৩ অক্টোবৰত সামাজিক মাধ্যমযোগে জনায় যে নিৰ্বাচিত মাৰ্চেণ্ট লেনদেনত MDR দীপাৱলীৰ পিছত কাৰ্যকৰী কৰা হ’ব। অৱশ্যে নতুন নিয়ম কাৰ্যকৰী হোৱাৰ নিৰ্দিষ্ট তাৰিখ এতিয়াও ঘোষণা কৰা হোৱা নাই।

২,০০০ টকাৰ ওপৰৰ লেনদেনত ০.৪ শতাংশ চাৰ্জৰ প্ৰস্তাৱ

প্ৰস্তাৱিত ব্যৱস্থা অনুসৰি, ২,০০০ টকাৰ অধিক মূল্যৰ কিছুমান UPI মাৰ্চেণ্ট লেনদেনত ০.৪ শতাংশ MDR আৰোপ কৰাৰ কথা আছিল। এই চাৰ্জ গ্ৰাহকে নহয়, ব্যৱসায়ীয়েহে বহন কৰিব লাগিলহেঁতেন। অৰ্থাৎ, গ্ৰাহকে ৪,০০০ টকাৰ সামগ্ৰী UPIৰ জৰিয়তে ক্ৰয় কৰিলে তেওঁ ৪,০০০ টকাই পৰিশোধ কৰিব লাগিব; প্ৰযোজ্য MDR ব্যৱসায়ীয়ে বহন কৰিব লাগিব।

টেলিকম, বীমা আৰু ইন্ধন খণ্ডৰ বাবে পৃথক প্ৰস্তাৱ

প্ৰতিবেদন অনুসৰি, টেলিকম, বীমা, ৰে’লৱে আৰু ইন্ধন আদি নিৰ্বাচিত শ্ৰেণীৰ ২,০০০ টকাৰ অধিক UPI লেনদেনৰ ক্ষেত্ৰত পাঁচ টকাৰ নিৰ্দিষ্ট MDR আৰোপৰ প্ৰস্তাৱো আছিল। এই ক্ষেত্ৰতো চাৰ্জ গ্ৰাহকৰ পৰা নহয়, মাৰ্চেণ্টৰ পৰাহে আদায় কৰাৰ কথা উল্লেখ কৰা হৈছিল।

এতিয়া কেতিয়াৰ পৰা কাৰ্যকৰী হ’ব নিয়ম?

১৫ অক্টোবৰৰ পৰিৱৰ্তে MDR ব্যৱস্থা দীপাৱলীৰ পিছত কাৰ্যকৰী কৰাৰ সিদ্ধান্ত লোৱা হৈছে। নতুন তাৰিখ পিছত ঘোষণা কৰা হ’ব। সেয়েহে এই প্ৰস্তাৱ সম্পূৰ্ণৰূপে বাতিল হৈছে নে পৰৱৰ্তী সময়ত কাৰ্যকৰী কৰা হ’ব, সেই বিষয়ে এতিয়াও নিশ্চিতকৈ ক’ব পৰা নাযায়।

ব্যৱস্থাটো কাৰ্যকৰী হ’লে নিৰ্বাচিত লেনদেনৰ ক্ষেত্ৰত ব্যৱসায়ীসকলৰ ওপৰত অতিৰিক্ত ব্যয়ৰ বোজা পৰিব পাৰে।